RADYO MERKADO BALITA SA AGA
MARCH 10, 2026- MARTES

TIME CHECK:
INTRO BUMPER
INTRO
Maayong aga! Ini ang Radyo Merkado Balita sa Aga. MARTES subong nga adlaw, MARSO DIYES  tuig dos mil beynte sais. Nagikan sa news center, Kami ang inyo mga tag-balita....

MELINDA
KEN

HEADLINES: KAG KARON SA MGA HEADLINES... 

LOCAL NEWS:
--Ginpirmahan na ni Iloilo City Mayor Raisa Treñas ang pag-tukod sang Energy Conservation Protocol sang Iloilo City Government kag pag-adopt sang four-day onsite work arrangement para sa city government employees

- Duha ka mga high value individuals ang arestado matapos makuhaan sang kapin 85 ka gramo sang shabu sa distrito sang Jaro

NATIONAL NEWS: 
-- Naglab-ot na sa kapin 70 ka mga gasolinahan ang gina-imbestigaran sang Department of Energy bangud sa ginapasuni nagapamentaha. Samtang PNP nagpa andam  nga arestohon ang nagapatigayon sang hoarding sang mga produktong petrolyo 
-- Four-day onsite kag one-day work-from-home arrangement  ginapatuman na sang pila ka ahensya sang gobyerno  


INTERNATIONAL NEWS: 
Mga pulis sa Norway ginakabig nga posible isa ka terrorist act ang nagluntad nga pagpambomba sa Embahada sang Estados Unidos sa Oslo.




SPORTS NEWS:
Alex Eala nakalab-ot sa round 16 sang Indian Wells matapos nag-atras ang ika-apat sa world ranking nga si Coco Gauff bangod sang injury sa ila match


BUSINESS: 
Naghina ang Philippine peso kag naglab-ot sa pikababag-o nga historic low kontra sa US dollar kahapon suno sa Bankers Association of the Philippines


ENTERTAINMENT: 
Pagpakasal sang aktres nga si Bea Alonzo sa iya boyfriend nga si Vincent Co gin-istoryahan sa social media matapos naguwa ang ngalan sa  marriage banns sang isa ka simbahan


TRENDING:  
LALAKI NAGPA-OSPITAL MATAPOS MAY NAGSANGAL SA IYA ALATRASAN …ANO AYHAN???

****BUMPER LOCAL NEWS***

LOCAL NEWS
LOCAL 1
Ginpirmahan na ni Iloilo City Mayor Raisa Treñas ang EXECUTIVE ORDER NO. 030, nga naga-tukod sang Energy Conservation Protocol sang Iloilo City Government kag pag-adopt sang four-day onsite work arrangement para sa city government employees, bilang pagsunod sa Memorandum Circular 114 nga gin-issue sang Office of the President, kag kabahin man sang efforts agud makakinot sa elektrisidad kag gatong. Antes ginpirmahan ang EO, ginhambalan anay ang mga dapat himoon antes ipatuman ang temporary implementation sang four-day work week bilang pagsunod sa advisory ni President Ferdinand Marcos Jr. kag masiguro ang epektibo kag sustainable nga serbisyo sa City Hall. Suno sa alkalde magapatuman sang alternative working arrangements, community day kag mga online seminars, trainings kag meetings nga himoon sa adlaw sang Biyernes. Apang, sa sini nga work arrangement wala malakip ang mga essential, basic, kag vital services. Ginpasiguro ni Treñas nga bisan may adjustment sa work schedule sang pila ka city government offices, wala sang maapektuhan nga essential services kag padayon nga makabaton ang publiko sang serbisyo nga ginakinahanglan. Katuyuan man sang executive order nga masiguro ang matalunsay nga implementasyon sang sini nga inisyatibo.


LOCAL  2

Mabudlay ang pagpatuman sang four-day workweek sa Iloilo Provincial capitol bangud sang madamo kag mabug-at nga workload sang pila ka opisina sa kapitolyo. Suno kay Iloilo Governor Arthur Defensor Jr. lakip nga maga-adopt sang pag-compress sang ila schedule ang sa pila ka local government units sa probinsiya para sa energy saving measure.// Ginpahayag sang gobernador nga nabudlayan na ang pila ka opisina sa capitol nga makompleto ang ila trabaho sa regular five-day schedule bangud sa dako nga volume sang trabaho kag public services nga gina-uyatan...  ano pa ayhan sa four-day work schedule. Ginhalimbawa sang gobernador ang kaugalingon nga eksperyensiya bilang local chief executive nga ang demand sang trabaho masami nagalapaw pa sa regular work-week. Apang sa pihak sang mabudlay nga pagsayo sa four-day workweek, ginpasiguro ni Defensor nga maga-cooperate ang Iloilo provincial government sa direktiba ni President Ferdinand “Bongbong” Marcos Jr. nga mag-adopt sang energy‑saving measures. Lakip sa tikang nga igakonsiderar ang pag-regulate sa pagamit sang electrical appliances sa mga opisina.


LOCAL 3
Bukas ang Guimaras provincial government sa pag-review sa ginaproponer nga pagpataas sa pletehan sa mga fiber boats nga naga biyahe Guimaras–Iloilo City kasunod sang hingyo sang transport operators kasunod  man sang pagsaka sa presyo sang gatong tuga sang tension sa Middle East. Ginaduso sang mga operator sang fiber boats ang dugang nga napulo tubtob kinse pesos sa pletehan bangud luwas sa pagtaas sa presyo sang petroleum products, nagtaas man ang administrative costs nga dugang palas-anon sa mga boat operator.// ginpasiguro ni Guimaras Gov. Lucille Nava nga handa ang provincial government nga tun-an ang request apang ginklaro nga anoman nga adjustment dapat maga-agi sa konsultasyon sa mga stakeholder antes maghimo sang desisyon. Dugang pa ni Nava nga dapat mangin mahinalungon ang mga otoridad sang pagbalanse sa isyu sang boat operators nga naga-antus sa mataas nga operating expenses kag kaayuhan sang mga commuters nga nagasalig sa adlaw-adlaw nga rota.//nahinambit man ni Gov. Nava nga may kasubong nga request sang fare increase sang nakaligad apang ginpamatukan ini sang local officials nga naga-ulikid sa mga sumalakay. Sa karon 30 pesos ang plete sa fiber boat para sa regular nga mga pasahero kag 25 pesos naman sa mga estudyante, senior citizen kag PWDs.



LOCAL 4
Nagpatigayon sang petition signing kahapon ang Jeepney drivers kag operators gikan sa pila ka transport coalitions, upod ang mga commuter kag consumer groups sa tatlo ka transport terminals sa siudad sang Iloilo.// Diri ginpanawagan sang grupo ang renewal sang five-year franchise para sa traditional jeepneys, suspension sang Enhanced Local Public Transport Re-Route Plan kag pagbasura sa Public Utility Vehicle Modernization Program. Ginpabutyag sang transport group nga ang polisiya ang pamahog sa kabuhian sang masobra 60 tubtob 75 porsyento sang first town jeepney drivers kag operators nga nagaserbe nga transport providers sa mga estudyante, workers, mangunguma kag iban nga sumalakay nga nagapadulong sa siudad sang Iloilo. Sa idalum sang E-LPTRP sang city government, 25-40% lamang sang first-town public Utility Vehivcles ang ginapasugtan nga makasulod sa siudad sa diin ang iban nga rota ang limitado sa gin-designate nga terminal kag transport hubs.


LOCAL 5
Pagasapulon subong nga adlaw sang Local Economic Enterprise Office (LEEO) ang mga bolantero sang Iloilo Terminal Market agud maplastar sa ila ang plano sang talatapan makaligad ang nagluntad nga clearing operation sang nagligad nga semana. Plano sang LEEO nga himoon ang Martes bilang market day para sa mga bolantero sa terminal market ukon super. Napalab-ot naman sang LEEO ang plano sa Market Vendors Association bangud apektado sila kun may nagabulante sa sagwa sang merkado.

LOCAL 6
Duha ka mga high value individuals ang arestado matapos makuhaan sang kapin 85 ka gramo sang shabu nga nagabalor sang 587-mil pesos. Ini sa ginpatigayon nga buy-bust operation alas-6:15 kagab-i, Marso 9 sa River Plains Subdivision, Brgy. Lanit sa Distrito sang Jaro.//Nadakpan sanday Alyas Sherwin, 44 anyos kag Alyas Jemar, 39 anyos, isa ka construction worker tanan sang amo man nga lugar.//nakuha sa duha ang walo ka sachet sang suspected shabu lakip ang buy-bust item kag 15 mil pesos nga buybust money.//ang mga narecover nga items ang iga-turn over sa PNO Iloilo City Forensic Unit samtang ang mga arestado ginturn over sa Iloilo city police station 3 para sa nagakaigo nga disposisyon sang iya kaso.//


LOCAL 7- LAST 
Patay ang 15 anyos nga estudyante sa  aksidente nga natabo sa tunga sang motorsiklo kag Elf truck sa Passi City kahapon sang hapon. Ang aksidente nagluntad sa Sara Road St., Poblacion Ilawod, Passi City sa diin naabtan sang nagresponde nga taga Bureau of Fire Protection ang duha ka mga biltima nga si Alyas Ban, 15 anyos  kag Alyas Kent, 17 anyos lunsay taga San Enrique Iloilo. Si Kent ang naga drive sang motorsiklo kag angkas si Ban nga nagtabog sang makabunggo sa Elf truck. Pauli na ang mga biktima sang matabo ang aksidente. Samad sa ulo ang naangkon ni Ban nga nakalampos sa semento bangud wala ini sang soksok nga helmet.

***LEAD TO GAP***
NABATIAN ANG ATON MGA BALITA LOKAL.....SA ATON NGA PAGBALIK MABATIAN NAMAN ANG KAUNDAN SANG BALITA NASYUNAL...

***NATIONAL NEWS BUMPER***
NATIONAL NEWS
NATIONAL 1
Naglab-ot na sa kapin 70 ka mga gasolinahan ang gina-imbestigaran sang Department of Energy (DOE) bangud sa ginapasuni nagapamentaha sa epekto sang gyera sa Middle East paagi sa mas temprano nga pagpatuman sang pagpasaka sa presyo sang petroleum products. Suno kay DOE secretary Sharon Garin, ang amo nga numero ang partial gid lamang kag may posibilidad nga madugangan subong nga semana samtang nagapadayon ang ila pag-inspeksyon sa nagkalain-lain nga bahin sang pungsod. Pila sa mga kompanya kag gasolinahan ang gulpi nga nagpasaka sang presyo sang ila mga produktong petrolyo antes pa man ang gintalana nga petsa. Mahimo nga ipasirado gilayon kag makansela ang permit sang mga negosyo kun mabug-at ang mga ebedensya kag mapamatud-an nga sila ang  naglapas sa ginpagua nga regulasyon.










NATIONAL 2
Nagpaandam si PNP chief General Jose Melencio Nartatez Jr., sa mga manager kag personnel sang mga gasolinahan nga mahimo sila arestohon kun mapamatud-an nga nagapatigayon sang hoarding sang mga produktong petrolyo sa tunga sang pagsaka sang presyo sini bangod sang padayon nga ginamo sa Middle East. Suno pa kay Nartatez nga ginabantayan sang ila mga intelligence unit ang nagkalain-lain nga bodega bangod sang posibilidad sang hoarding kag iban pa nga iligal nga aktibidad kag mahimo nga arestohon ang sino man nga maaktohan nga nagatago sang suplay sang petrolyo agud mapataas ang presyo sang petroleum products. Ginmanduan na sini ang Criminal Investigation and Detection Group ukon CIDG, PNP Maritime Group kag PNP Highway Patrol Group agud bantayan kag tutukan ang posible nga mga aktibidad sang hoarding.
Dugang pa sini, nagsugod na ang kapulisan sang pag-koordinar sa Department of the Interior and Local Government ukon DILG agud masiguro nga nagasunod ang mga nagabaligya sang petroleum products sa direktiba sang Department of Energy sa ila tagsa ka lugar.


NATIONAL 3
Ginpasiguro ni Senate president Tito Sotto III nga prayoridad sang senado ang paghatag sang emergency powers kay presidente Ferdinand Marcos Jr. agud maaksyonan ang epekto sang pagsaka sang presyo sang mga produktong petrolyo bangod sang kinagamo sa Middle East. Suno kay Sotto, ginapaabot niya ang official request halin sa Malacañang para sa paghatag sang emergency powers sa presidente. Sa ti-on nga mabaton, gilayon niya nga ipasa ang proposal sa nagkalain-lain nga komite sang Senado kag paga istoryahon sini ang mga chairman sang Committee on Ways and Means, Finance kag Energy. Kapareho sa iban, maga-agi  anay ang  hagna para sa emergency powers sa mga hearing antes ipasar... magluwas gid lamang kun ideklarar ini nga urgent agud mapadali ang pag-apruba sini. 





NATIONAL 4
Ginmanduan sang Department of Education ang mga opisina sini sa bug-os nga pungsod nga ipatuman ang apat ka adlaw nga opisina halin Lunes tubtob Huwebes samtang work from home naman kada Biyernes. Ini ang kabahin sang pagtinguha sang gobyerno agud maka-kinot sang kuryente kag mabuhinan ang konsumo sang petrolyo. Ginpatuman ang polisiya sa gahum sang DepEd Memorandum No. 018 series of 2026 nga ginpermahan ni  Education Secretary Sonny Angara. Epektibo ang bag-o nga work set-up sa mga talatapan sang Deped umpisa kahapon Lunes, Marso 9 kag magapadayon tubtob nga kuhaon sang presidente ang mandu.  Sakop sang work-from-home arrangement ang teaching kag non-teaching personnel, contractual kag job orders. Igapadayon naman sang mga teaching staff ang ila class schedule agud indi ma-delay ang klase kag mga aktibidad antes magtakop ang school year. 


NATIONAL 5
Umpisa kahapon nga adlaw, Lunes, gin-implementar man sang Supreme Court ang four-day onsite kag one-day work-from-home arrangement  bilang kabahin sang mga tikang sa  pagkinot sang enerhiya sang gobyerno kasunod sang mga tensyon sa middle east. Sang nagligad nga semana, nagpaguwa sang memorandum ang Office of the President nga nagamandu sang istrikto nga pagpatuman sang energy conservation protocols kag flexible nga work arrangements bangud sa nagataas nga presyo sang mga produktong petrolyo. Ginpahayag ni Chief Justice Alexander Gesmundo sa isa ka memorandum nga kinahanglanon man nga magtuman diri ang Korte Suprema agud makakinot.  
Ginpasiguro man sang pinakamataas nga korte nga ang mga presiding judge kag court personnel nga naga-work from home ang ginalauman nga mag-obserbar sang regular working hours kag bukas ang mga linya sang komunikasyon.


NATIONAL 6
Gin-aprubahan na sang House Committee on Ways and Means ang tax provisions sang hagna sa pagdula sang travel tax para sa mga Pilipino nga nagabiyahe pa-gwa sang pungsod. Lakip sa gin-aprubahan nga substitute bill ang Travel Tax Abolition Bill nga ginpasar ni house majority leader kag Ilocos Norte representantive Sandro Marcos. Kasunod sini, paga-usisaon sang House Committee on Appropriations ang nasambit nga hagna.  Suno kay Marikina Representative kag committee chairman, Miro Quimbo, ginapamatian kag  ginkonsiderar nila ang mga opinyon sang nagkalain-lain nga ahensya may kaangtanan sa mga programa nga ginapondohan sang travel tax. Lakip sa mga ini ang sektor sang turismo, edukasyon kag kultura nga suno kay Quimbo dapat gihapon mapondohan sa idalom sang national budget. Ang nasambit nga hagna ang kabahin man sang mga prayoridad sang Legislative-Executive Development Advisory Council ukon LEDAC.


NATIONAL 7
Ginmanduan ni presidente Ferdinand Marcos Jr. ang mga telecommunication companies nga maghatag sang libre nga komunikasyon para sa mga Overseas Filipino Workers (OFWs) sa Middle East. Suno sa presidente, sakop sang “Libreng Tawag Program” ang paghatag bulig sa mga Pilipino nga yara sa mga pungsod nga apektado sang nagataas nga tensyon sa rehiyon pareho sang Iran, Iraq, Bahrain, Kuwait, Oman, Qatar, United Arab Emirates, kag Saudi Arabia. Dugang pa niya, magatukod man ang mga public telecommunications entities sang mga libre nga call stations sa pila ka business centers kag mga daku nga mall sa pungsod. Ang nasambit nga programa ang may katuyuan nga buligan ang mga pamilya sang OFWs nga makatawag kag makapakig-angut sa ila mga himata sa kabuhi agud makumpirmar ang ila kahimtangan nga wala sang dugang nga balayran.

NATIONAL 8
Nagpatuman sang pagbalasa ang Philippine National Police (PNP) sa pila ka mga matag-as nga opisyal sini epektibo kahapon Lunes, Marso 9. Sa ginpaguwa nga mandu, gindesignar ni PNP Chief Gen. Jose Melencio Nartatez Jr. si Highway Patrol Group (HPG) Police Brig. Gen. Hansel Marantan nga bag-o nga director sang Police Regional Office Calabarzon ukon PRO 4A. Ang nasambit nga posisyon ang halin kay Brig. Gen. Paul Kenneth Lucas, nga gindesignar naman bilang bag-o nga director sang Special Action Force (SAF). Pagatal-usan naman si Marantan sa pagka-direktor sang HPG ang subong nga Directorate for Police Community Relations (DPCR) Executive Officer  nga si Brig. Gen. Jessie Tamayao.





**INTERNATIONAL NEWS BUMPER***
INTERNATIONAL NEWS

INT. NEWS 1
Ginkabig sang kapulisan sa Norway nga posible isa ka terrorist act ang nagluntad nga pagpambomba sa Embahada sang Estados Unidos sa Oslo. Bangod sang insidente, naguba ang  pila ka bahin sang building apang wala man sang may na-report nga nasamaran. Suno kay Frode Larsen sang police joint investigation and intelligence unit, daku ang ila pagpati nga ang natabo ang isa ka sahi sang terorismo, apang wala nila gina bale-wala ang posibilidad sang iban pa nga motibo sa likod sang insidente. Padayon ang ila koordinasyon sa mga diplomat sang Estados Unidos agud makabulig sa nagapadayon nga imbestigasyon.


INT. NEWS 2
Ginkabahala sang World Health Organization ukon WHO ang ginhimo nga pag-atake sang Israel sa oil facilities sang Iran. Suno kay WHO chief Tedros Adhanom Gebreyesus , may negatibo nga epekto ini sa ikaayong lawas ilabi na sa mga kabataan kag mga tigulang. Isa sa mga gin- halimbawa sini amo nga ma-contaminate ang ila pagkaon, tubig kag bisan ang hangin. Madumduman nga gin kumpirma sang Iran nga naigo ang pila nila ka oil facilities sa Tehran kag kalapit nga mga probinsya sang Alborz nga gintarget sang puwersa sang Amerika kag Israel. Nagbalos naman ang Iran kag naglunsar sang mga missiles kag drones kag gintarget ang pila ka mga  energy infrastructures sa malapit nga Arab Gulf states.



***SPORTS BUMPER***
SPORTS NEWS
SPORTS NEWS 1
Nakalab-ot sa round 16 sang Indian Wells ang rising Filipina tennis star nga si Alex Eala matapos nag-atras ang ika-apat sa world ranking nga si Coco Gauff bangod sang ginabatyag nga injury sa ila third-round match kahapon. Ang 20-anyos nga si Eala ang nagapanguna sa score nga 6-2, 2-0 sang magdesisyon si Gauff nga indi na magpadayon sa sambuwa matapos ini makabaton sang medical treatment sa iya nawala nga butkon. Ginpahayag ni Eala nga indi sini luyag nga magdaug sa amo nga paagi. Apang para sa iya, isa ini ka daku nga kadungganan nga makahampang sa Stadium One sang Indian Wells batok sa isa ka mabaskog nga kontra. Nagpaabot man ini sang iya mensahe kag wpara kay Gauff para sa sa iya madasig nga pag-ayo.



***BUSINESS NEWS BUMPER***
BUSINESS NEWS 
NEWS 1

Naghina ang Philippine peso kag naglab-ot sa pikababag-o nga historic low kontra sa US dollar kahapon Lunes bangud sa global uncertainties nga epekto sang ginamo sa middle east. Suno sa Bankers Association of the Philippines, nagsarado ang piso sa 59 pesos kag 50 sentimos kada isa ka dolyar sa pagtakup  sang trading kahapon. Naglab-ot pa sa 59 pesos kag 71 sentimos kada isa ka dolyar ang paghina sang piso sa tunga-tunga sang  trading.  Ginalauman na nga ang mas mahina nga piso ang maga pamahal sang pagbakal sang produktong petrolyo bangud dolyar ang ginagamit sa pagbakal sang nasambit nga produkto. Ginalauman man nga maapektohan ang utang sang pungsod sa mga foreign creditors.
SA ATON REFERENCE RATE, 58 PESOS KAG 90 SENTIMOS ANG BAYLO SANG ISA KA U-S DOLLAR.






***ENTERTAINMENT BUMPER***
ENTERTAINMENT NEWS
ENT. NEWS 1
Gina istoryahan subong sa social media ang posible pagpakasal sang aktres nga si 
Bea Alonzo sa iya boyfriend nga si Vincent Co pagkatapos naguwa ang ngalan sa  marriage banns sang St. Peter the Apostle Parish sadtong Marso 8. Sa livestream sang simbahan, gin-anunsyo ang ila plano nga pagpakasal santo sa tradisyon Katoliko. Ginhambal man sa anunsyo nga pareho na sila nga naga estar sa isa ka luxurious area sa Paco, Manila.
Sadtong Agosto 2025, ginkumpirma ni Alonzo ang ila relasyon ni Co, nga presidente sang isa ka sikat nga supermarket. Antes sini, masami na sila nga nakit-an nga magkaupod sa mga social kag corporate events antes pa man ang  opisyal nga anunsyo sang aktres.



***TRENDING NEWS BUMPER***
TRENDING NEWS
LALAKI NAGPA-OSPITAL MATAPOS MAY NAGSANGAL SA IYA ALATRASAN …ANO AYHAN???

May ara gid nagakatabo in reality nga naga-eksperimento para sa kaigalingon nga kalipay…indi man pwde nga aksidente lang apang kun may ginhimo ka nga daw ka unusual indi magkahuya no by kun para sa imo kaayuhan…ang istorya natabo matapos nagpadulong sa ospital ang isa ka lalaki bangud indi na sini maagwantahan ang kasakit nga nabatyagan. Ini bangud aang butang nga nagasangal sa iya alatrasan..ginpa-idalum ini sa CT scan kag nakita ang rectal foreign body sa sulod nga nagalaba sang 21’cm..nakita ang korte kag characteristics sini compatible sa….cucumber ukon pipino..yessss cucumber gid!
Sa pihak sang medical gossip nga nag-spark sang curiosity, ini nga kaso indi na bag-o kun basehan naton ang internet. Bisan ini kaladlawan sa iban, apang sa natungdan,  peligroso ini katama kun indi ma-handle gilayon. Ang leksyon diri indi ang meme..kundi ang health..suno kay Dr. Paola Ruiz, sa sitwasyon kasubong sini ang husto nga himoon amo ang pagkadto sa emergency room kag indi magkahuya…agud malikawan ang complications.

EXTRO
Kag  amu yadto ang MARTES nga edisyon sang Radyo Merkado Balita sa Aga, MARSO DIYES, TUIG DOS MIL BEYNTE SAIS.. Kami ang inyo nangin tagbalita.

MELINDA
KEN 
Sa Iloilo, Ini ang Radyo Merkado
ANG BOSES, SA PUSO NG BAYAN!!